מלוה מלכה

מלוה מלכה – "באגלייטן די קעניגין" – איז די סעודה וואס אידן עסן מוצאי שבת, נאך הבדלה. דער געדאנק איז צו באגלייטן די "שבת מלכה" ביים ארויסגיין מיט זינגען און עסן, ווי מען באגלייט א קעניג ווען ער פארלאזט א שטאט.

דער מקור פונעם מנהג איז אין גמרא: "לעולם יסדר אדם שולחנו במוצאי שבת" – א מענטש זאל שטענדיג גרייטן זיין טיש מוצאי שבת. די סעודה ווערט אויך אנגערופן "די פערטע סעודה", נאך די דריי סעודות פון שבת, און עס איז באקאנט אלס די סעודה פון דוד המלך.

ביי חסידים איז מלוה מלכה א ספעציעלע צייט: מען זינגט זמירות ווי "המבדיל" און "אליהו הנביא", מען דערציילט מעשיות פון צדיקים, און אסאך רביים פירן טישן מוצאי שבת.

א "מלוה מלכה" איז אויך דער נאמען פאר א פארזאמלונג מוצאי שבת – אפט א צדקה-אונטערנעמונג פאר א ישיבה אדער ארגאניזאציע – מיט עסן, מוזיק, א זינגער און א בדחן.