חלה

חלה איז דאס ספעציעלע ברויט וואס מען עסט אום שבת און יום טוב (אויסער פסח און יום כיפור). געווענליך איז זי געפלאכטן, און אויפן טיש ליגן צוויי חלות, א זכר צו דעם "לחם משנה" – דאס טאפלטע מן וואס איז געפאלן ערב שבת אין מדבר.

דער נאמען "חלה" קומט פון דער תורה, און מיינט אויך דאס שטיקל טייג וואס מען נעמט אפ פון דעם טייג – "הפרשת חלה". אין מיטל-אייראפע האט מען זי אויך גערופן "בערכעס".

אין חסידישע שטובן איז פארהאן א גרויסע אויסוואל פון פארמען: זעקס- און צוועלף-געפלאכטענע, קיילעכדיגע חלות פאר ראש השנה, און טייל באקן א "שליסל חלה" אויף שבת נאך פסח. ביי א רבי'נס טיש ווערט די חלה צעטיילט אלס שיריים.