מחנה יהודה שוק

דער מחנה יהודה מארק, וואס מען רופט פשוט "דער שוק", איז א מארק אין ירושלים, ליב סיי ביי די איינוואוינער סיי ביי טוריסטן. מער ווי 250 פארקויפער פארקויפן דארט פרישע פרוכט און גרינסן, געבעקס, פיש, פלייש און קעז, ניסלעך און געווירצן, וויין, קליידער, הויז־זאכן און יודאיקא.

דער שוק איז באקאנט פאר זיין לעבעדיגקייט – די פארקויפער שרייען אויס זייערע פרייזן צו די פארבייגייער. דאנערשטאג און פרייטאג איז דער שוק געפאקט מיט אידן וואס קויפן איין אויף שבת, ביז ערב שבת נאכמיטאג, ווען מען הערט א טרומייט וואס זאגט אן אז דער מארק מאכט צו לכבוד שבת. דער שוק ליגט צווישן יפו גאס און אגריפס גאס.