יהונתן בן שאול

יהונתן איז געווען שאול המלך'ס זון. מיט נאר זיין כלי-טרעגער איז ער ארויף אויף א פלשתים-פאסטן, און די פלשתים זענען אנטלאפן (שמואל א' י"ד).

נאך דוד'ס נצחון איבער גלית, 'ונפש יהונתן נקשרה בנפש דוד' (שמואל א' י"ח:א'). ער האט געווארנט דוד ווען שאול האט אים געוואלט הרג'ענען, אפילו ווען ער האט געוואוסט אז דוד וועט ווערן מלך אנשטאט אים (שמואל א' כ'). יהונתן איז אומגעקומען מיט זיין פאטער אויף הר הגלבע, און דוד האט אים בעוויינט (שמואל ב' א'). די משנה זאגט: 'איזו היא אהבה שאינה תלויה בדבר — זו אהבת דוד ויהונתן' (אבות ה':ט"ז).