חסידות ראצפערט

געשיכטע

חסידות ראצפערט איז א צווייג פון צאנז. דער גרינדער איז געווען ר' שלום אליעזר האלבערשטאם, דער יונגסטער זון פונעם "דברי חיים" פון צאנז, געבוירן בערך אין חול המועד פסח תרכ"ב (1862). נאך זיין חתונה האט ער געוואוינט ביי זיין שווער, דער הארנאסטייפלער רבי ר' מרדכי דוב, ביז די רוסישע רעגירונג האט אים ארויסגעשיקט צוריק קיין גאליציע. אין תר"ס (1900) איז ער אריבער קיין אונגארן, ערשט אין טעגלאש און דערנאך אין ראצפערט, ווי ער האט געפירט חסידים. ער איז אומגעקומען על קידוש השם אין אוישוויץ ט"ז סיון תש"ד (1944). זיין טאכטער איז געווען די רביצין פון ר' חיים צבי טייטלבוים, דער סיגעטער רב. (אין ראצפערט איז אויך געווען א באזונדערער הויף פון ר' נפתלי הירצקא הלוי זילבערמאן, א תלמיד פונעם צאנזער רב, אבער ער איז נישט פארבונדן מיט דער משפחה.) נאך דער מלחמה האט ר' יואל בער, אן איידעם פון ר' משולם זושא (ר' שלום אליעזר'ס זון), אויפגעשטעלט א בית מדרש אין וויליאמסבורג, און שפעטער אין סאו פאולא, בראזיל, א קהילה אויפ'ן נאמען פון זיין שווער; ער איז נסתלק געווארן כ"ט אדר תשנ"ג (1993).

היינט

נאך ר' יואל'ס פטירה האט זיין איידעם דער קרעטשניפער רבי געקרוינט זיין איינציגן זון ר' זושא בער אלס רבי (ער וואוינט היינט אין מאנסי), און זיין איידעם ר' יצחק דוד הורוויץ אלס גאב"ד פון דער קהילה. עס איז דא א "כולל ראצפערט" אין אלעד, ארץ ישראל (לויט באריכטן).