דער רבי'נס טיש

א "טיש" איז א פארזאמלונג פון חסידים ארום זייער רבי, מיט דברי תורה, ניגונים און זמירות, און מען טיילט אויס עסן. חסידים באטראכטן עס פאר א הייליגן מאמענט. מען רופט עס אויך "עריכת השולחן", און ברויט און וויין זענען א וויכטיגער טייל דערפון.

ביים טיש זיצט דער רבי אויבן אן, און די חסידים שטייען ארום. אין גרויסע חסידישע הויפן עסט נאר דער רבי מיט זיין נאענטע משפחה און א פאר נאענטע חסידים, און דער רבי טיילט אויס "שיריים" – קליינע שטיקלעך ברויט, פיש, פלייש, פארפל, בעבלעך, קוגל, קוכן אדער פרוכט – פאר אלע. אין די גרעסטע הויפן שטעלט מען אויף "פארענטשעס", הויכע טרעפ־בענק וואו די חסידים שטייען און קוקן אויפן טיש. דער קלאנג פון טויזנטער חסידים וואס זינגען צוזאמען איז אן איבערלעבעניש וואס מען פארגעסט נישט.