קידוש לבנה

קידוש לבנה איז די ברכה און תפילה וואס מען זאגט אויף דער נייער לבנה, געווענליך אום דעם ערשטן אדער צווייטן מוצאי שבת פון יעדן חודש. נאך מעריב גייט מען ארויס פון שול, שטעלט זיך אונטער דעם הימל, און מען זאגט די ברכה אויף דער לבנה.

אין רוב קהילות געהערט דערצו דער באקאנטער "שלום עליכם" – מען זאגט איינער צום צווייטן "שלום עליכם" און מען ענטפערט "עליכם שלום" – און מען שפרינגט דריי מאל אקעגן דער לבנה. די ברכה אליין שטאמט פון דער גמרא, און אנדערע טיילן זענען צוגעקומען שפעטער.

ביי חסידים זאגט מען עס מיט גרויס שמחה, אפט מיט זינגען און טאנצן, און אין טייל הויפן מיטן רבי'ן.