אהרן הכהן

אהרן הכהן איז געווען דער עלטערער ברודער פון משה רבינו (שמות ז':ז'). דער אייבערשטער האט אים געשיקט צו רעדן פאר משה צו פרעה (שמות ד':י"ד–ט"ז).

ער און זיינע זין זענען אויסגעקליבן געווארן פאר כהנים, און ער איז געווען דער ערשטער כהן גדול (שמות כ"ח). זיינע צוויי זין נדב און אביהוא זענען אומגעקומען ביי דער חנוכת המשכן (ויקרא י'). זיין שטעקן האט געבליט מיט מאנדלען, א סימן אז שבט לוי איז אויסגעקליבן (במדבר י"ז:כ"ג).

אהרן איז נפטר געווארן 123 יאר אלט אויף הר ההר, ראש חודש אב (במדבר ל"ג:ל"ח–ל"ט), און 'ויבכו את אהרן שלשים יום כל בית ישראל' (במדבר כ':כ"ט). הלל זאגט: 'הוי מתלמידיו של אהרן, אוהב שלום ורודף שלום' (אבות א':י"ב).