פורים שפיל

דער פורים שפיל איז א טראדיציאנעלע פורים-פארשטעלונג, מערסטנס א קאמישע פארשטעלונג פון דער מעשה אין מגילת אסתר – ווי המן האט געוואלט פארטיליגן די אידן, און ווי מרדכי און דער נס האבן זיי געראטעוועט.

היסטאריקער רופן דעם פורים שפיל "דער איינציגער אמת'ער פאלקס-טעאטער וואס האט איבערגעלעבט טויזנט יאר אין אייראפע". ער פארמישט טעקסט, שפיל, מוזיק, טאנצן, לידער, פאנטאמימע און פארשטעלונגען, און ער ווערט גערעכנט אלס דער אנפאנג פונעם אידישן טעאטער.

אין די חסידישע געגנטער לעבט דער מנהג ביז היינט. אין ישיבות און חדרים שטעלן בחורים און אינגלעך אויף פורים שפילן, ביי פורים סעודות פון רביים טרעטן אויף בדחנים און "פורים רבנים", און גרופעס בחורים גייען ארום פון הויז צו הויז מיט קורצע שפילן און לידער, צו זאמלען געלט פאר צדקה.

ווי עס שטייט אין דער מגילה – "ונהפוך הוא": אויף פורים ווערט אלעס איבערגעדרייט, און א ביסל הומאר ברענגט שמחה פאר יעדן.