קוויטל

א קוויטל איז א צעטל אויף וועלכן א חסיד שרייבט א בקשה, און גיט עס צו זיין רבי'ן כדי צו באקומען א ברכה. די בקשה קען זיין אלגעמיין – פאר געזונט, פרנסה אדער הצלחה – אדער ספעציפיש, ווי א רפואה, א שידוך אדער אנדערע ישועות.

דאס שרייבן, געבן און ליינען א קוויטל איז א זייער ערנסטע זאך סיי פארן חסיד סיי פארן רבי'ן, און עס גייט לויט באשטימטע סדרים. ווייל א קוויטל האט קדושה, ווארפט מען עס נישט אוועק נאכן נוצן; מען פארברענט אדער מען באגראבט עס. דער מנהג גייט ווייטער היינט אין אלע חסידישע הויפן. אידן לייגן אויך קוויטלעך ביי די קברים פון רביים און צדיקים, און עס איז אן אלטער מנהג צו לייגן קוויטלעך מיט תפילות צווישן די שטיינער פונעם כותל המערבי.