קדם

קדם (Kedem) איז א קאשערע עסן- און געטראנק-פירמע, באקאנט אין יעדן אידישן הויז פאר איר וויינטרויבן-זאפט פאר קידוש, איר ניו יארקער ווייַן, און – פארשטייט זיך – די "קדם טי ביסקוויטס".

די פירמע איז געגרינדעט געווארן אלס "רויאל וויין קארפאריישאן" אין יוני 1948, און זינט 1958 ווערט זי געפירט דורך דער הערצאג פאמיליע. די הערצאגס האבן אמאל געהאט א ווייַנגארטן אין טשעכאסלאוואקיי, וואס איז געווען דער ספעציעלער ווייַן-ליפערער פארן קייסער פראנץ יאזעף. אין דער מלחמה האבן די נאציס צוגענומען דעם ווייַנגארטן; די פאמיליע האט זיך באהאלטן, און נאכ'ן קאמוניסטישן איבערקערעניש אין 1948 זענען זיי אנגעקומען קיין אמעריקע.

היינט פארקויפט קדם איבער א מיליאן קעסטלעך ווייַן און וויינטרויבן-זאפט א יאר, אין זעכצן לענדער. די הויפט-ביורא איז אין בעיאן, ניו דזשערזי, און די ווייַנגערטנער ליגן אין מארלבארא, ניו יארק. די שוועסטער-פירמע "קדם פודס" איז א טייל פון "קייקא", די גרעסטע קאשערע עסן-גרופע.