המן הרשע

המן בן המדתא האגגי איז געווען דער רשע אין מגילת אסתר. אחשורוש האט אים געמאכט פאר דעם העכסטן שר אין זיין מלוכה (אסתר ג':א').

מרדכי היהודי האט זיך נישט געבוקט פאר אים (אסתר ג':ב'), און המן האט באשלאסן אויסצוראטן אלע אידן. ער האט געווארפן גורל (פור) און אויסגעקליבן דעם י"ג אדר, און באקומען א בריוו פונעם קעניג (אסתר ג':ז'–י"ג).

דורך אסתר המלכה'ס סעודות האט זיך אלעס איבערגעדרייט: המן איז אויפגעהאנגען געווארן אויף דעם בוים וואס ער האט צוגעגרייט פאר מרדכי (אסתר ז':י'), און זיינע צען זין זענען אויך אויפגעהאנגען געווארן (אסתר ט':ז'–י"ד). דאס איז דער נס פון פורים.

'האגגי' ווערט געלערנט אז ער שטאמט פון אגג, דער מלך פון עמלק (זעה שמואל א' ט"ו). די גמרא דערציילט אז המן איז פריער געווען א שערער אין כפר קרצום 22 יאר (מגילה ט"ז ע"א). דער מנהג איז צו קלאפן ביים נאמען 'המן' ביים מגילה ליינען.