רחל אמנו

רחל אמנו איז געווען די יינגערע טאכטער פון לבן. יעקב האט זי באגעגנט ביים ברונעם (בראשית כ"ט:ט'–י"ב), און געארבעט זיבן יאר פאר איר, 'ויהיו בעיניו כימים אחדים באהבתו אותה' (בראשית כ"ט:כ'). לבן האט אבער ערשט געגעבן לאה. חז"ל זאגן אז רחל האט איבערגעגעבן די סימנים צו לאה, זי זאל נישט פארשעמט ווערן (מגילה י"ג ע"ב).

לאנגע יארן האט זי נישט געהאט קיין קינדער, ביז דער אייבערשטער האט זיך דערמאנט אין איר, און יוסף איז געבוירן געווארן (בראשית ל':כ"ב–כ"ד). זי איז נפטר געווארן ביים געבוירן בנימין, אויפן וועג קיין אפרת (בית לחם), און דארט באגראבן (בראשית ל"ה:ט"ז–כ').

דער נביא זאגט: 'רחל מבכה על בניה' — און דער אייבערשטער ענטפערט: 'מנעי קולך מבכי... ושבו בנים לגבולם' (ירמיה ל"א:י"ד–ט"ז). ביז היינט קומען אידן מתפלל זיין ביי קבר רחל.