מוטי שטיינמעץ

ישראל ברוך מרדכי "מוטי" שטיינמעץ איז געבוירן געווארן אין 1992 אין בני ברק, אין א וויזשניצער חסידישער משפחה. ער איז דאס פערטע פון נייַן קינדער.

ווען ער איז געווען פערצן יאר אלט, איז זיין זיידע אריבער פון אנטווערפן קיין ארץ ישראל, און האט אים געלערנט אסאך אלטע וויזשניצער ניגונים – דאס האט שטארק באאיינפלוסט זיין סטייל. אלס יונגער בחור האט אים אנטדעקט דער פראדוסער און קאמפאזיטאר ראובי בנעט, וואס איז שפעטער געווארן זיין מענעדזשער.

אין 2017 איז ארויס זיין ערשטער אלבום, "הנשמה בקרבי", וואס האט געדויערט פיר יאר צו מאכן און האט דערגרייכט "פלאטין" אין ארץ ישראל. ביים ארויסגעבן זענען געווען דער אשכנזישער הויפט-רב פון ארץ ישראל, הרב דוד לאו, און די בירגערמייסטערס פון בני ברק און אלעד. שפעטער זענען ארויס "עתיק יומין" (2022) און "אמונה ובטחון" (2025).

זיין טיפע, געפילפולע שטימע ברענגט צוריק דעם טעם פון אמאליגע חסידישע ניגונים פאר א נייעם דור.