במבה

במבה איז א ישראלישער סנעק געמאכט פון אויפגעבלאזענע קארן מיט א טעם פון פינאט־פוטער, פראדוצירט דורך דער אסם פירמע אין קרית גת. זי איז ארויס אין 1964, און איז איינע פון די הויפט־סנעקס אין ארץ ישראל – 25 פראצענט פון דעם גאנצן סנעק־מארק אין לאנד.

אסם האט עס גערופן "במבה" ווייל עס הערט זיך ווי קינדער־שפראך. במבה האט נישט קיין פרעזערוואטיוון אדער פארבן, און איז באפעסטיגט מיט וויטאמינען. זי איז כשר מיט דעם הכשר פון דעם בד"ץ ירושלים. מען מאכט עס דורך "פאפן" קארן אונטער הויכן דרוק, אפשניידן אין שטיקלעך און באקן מיט לופט – און דערנאך קומט דער פינאט־פוטער. פון ארץ ישראל ביז בארא פארק, א קינד מיט א זעקל במבה איז א בילד וואס יעדער קען.