מאה שערים

מאה שערים איז געגרינדעט געווארן אין 1874 דורך א בוי־געזעלשאפט פון הונדערט שותפים, וואס האבן צוזאמגעלייגט זייער געלט צו קויפן א שטח לאנד אינדרויסן פון דער ענגער און איבערגעפולטער אלטשטאט. איינער פון די גרינדער איז געווען הגאון ר' מאיר אויערבאך זצ"ל, דער אשכנזישער רב פון ירושלים.

דער נאמען קומט פון א פסוק אין דער פרשה וואס מען האט געליינט די וואך ווען די שכונה איז געגרינדעט געווארן: "ויזרע יצחק בארץ ההיא וימצא בשנה ההוא מאה שערים, ויברכהו ה'" (בראשית כו, יב). לויט א מסורה האט די שכונה ערשט געהאט הונדערט טויערן. היינט וואוינען דארט אשכנזישע חרדישע אידן, און די געסלעך, שולן, ישיבות און קליינע געשעפטן היטן אפ דעם אלטן ירושלים'ער אידישן חן.