חול המועד טריפס

חול המועד זענען די מיטלסטע טעג פון פסח און סוכות, וואס זענען הלכה'דיג צווישן יום טוב און א וואכנטאג. פאר פרומע משפחות זענען די טעג די גרויסע צייט פון אויספלוגן: די טאטעס ארבעטן נישט, די חדרים און ישיבות זענען פריי, און מען זוכט וואו צו גיין.

אין אמעריקע פארן משפחות צו זאא'ס, אקוואריומס, פארקס, "פיקינג"-פארמס און שיפן; אסאך ארטן מאכן ספעציעלע "חול המועד" טעג מיט כשר'ע עסן און מוזיק. אין ארץ ישראל זענען די נאציאנאלע פארקס, דער כנרת און די בערג פון צפון פול מיט חרדישע משפחות, און פיל גייען צו קברי צדיקים.

דער גרויסער שטופ ביי די אינגאנגען, די קאר פול מיט קינדער און סענדוויטשעס, און דאס "ווי לאנג נאך?" פון הינטן – דאס אלעס איז שוין א חלק פון יום טוב.